Милош Јованов е роден во Скопје. Дипломирал на Правниот факултет „Јустинијан Први“ во Скопје, на студиите по новинарство.

Има петнаесетгодишно искуство во истражување на јавното мислење и е автор на повеќе публикации.

Активно е вклучен во граѓанскиот сектор и соработува со неколку организации во Македонија како експерт за истражување на јавното мислење преку телефонски и теренски анкети, како и за модерирање фокус-групи.

Неговиот фокус се теми поврзани со младите, политиката и политичките истражувања.

Учествувал во бројни домашни и меѓународни проекти поврзани со демократски процеси, младински политики и граѓанско учество.

Посебен интерес има за анализа на политичките трендови и однесувањето на гласачите, комбинирајќи квантитативни и квалитативни методи за релевантни и практични податоци.

Проф. д-р Софија Георгиевска е универзитетска професорка, кариерен советник, психолог и ментален тренер. Вработена е на Филозофскиот факултет при Универзитетот „Св. Кирил и Методиј“ во Скопје.

Предава предмети од областа на методологијата на научно истражување, статистика, младинска работа, ментално здравје и креативни техники.

Таа е раководител на Центарот за менаџмент на човечки ресурси при Филозофскиот факултет, како и раководител на последипломските студии по младинска работа и меѓународни односи.

Активно работи во областа на менталниот тренинг со спортисти, обезбедувајќи психолошка подготовка и поддршка за развој на самодоверба, концентрација, мотивација и справување со притисок.

Како сертифициран кариерен советник, има долгогодишно искуство во работа со млади, студенти и професионалци и учествувала во бројни домашни и меѓународни проекти, обуки и конференции поврзани со образованието, младинската работа и психосоцијалната поддршка.

Д-р Игор Бимбилоски е доктор по технички науки со повеќе од 25 години менаџерско искуство во домашни и интернационални компании во Северна Македонија и регионот.

Дипломирал, магистрирал и докторирал на Факултетот за електротехника и информациски технологии при Универзитетот „Св. Кирил и Методиј“ во Скопје.

Во текот на својата кариера извршувал функции на извршен директор и член на раководни тимови во повеќе меѓународни компании од областа на ИКТ, телекомуникациите, енергетиката, здравството и дигиталните технологии.

Активно учествувал во работата на бизнис асоцијации, стопански иницијативи и владини тела поврзани со дигитализација, технолошки развој и економски политики.

Неговото искуство опфаќа управување со комплексни бизнис и технолошки трансформации, стратешки развој, дигитализација и реализација на големи проекти во јавниот и приватниот сектор на национално и регионално ниво.

Ристе Костовски е магистер по економски науки со долгогодишен ангажман во младинскиот, студентскиот и граѓанскиот сектор.

Уште во средношколските денови бил активен како Заменик Дете Правобранител, а подоцна активно учествувал во студентските организации и универзитетските тела.

Автор е на повеќе трудови од областа на макроекономијата презентирани на конференции на ASECU и дипломирал на тема поврзана со странските директни инвестиции.

Магистрирал по Монетарна економија, финансии и банкарство со просечен успех 9,57, со истражување во областа на јавните финансии.

Од 2021 година е дел од Стопанска Банка АД Скопје, а паралелно активно работи како експерт и истражувач на проекти поврзани со социјалното претприемништво и други општествени теми.

Автор е на бројни колумни и брифови за политики, а неговиот професионален фокус е насочен кон економскиот развој и јавните политики.